Félagið boðar aukna samkeppni á markaði en eitt af megin markmiðum er að gera flugferðir til og frá landinu ódýrari en áður hefur sést.  Nú þegar má merkja lækkun fargjalda  með innkomu WOW air. 

Baldur Oddur Baldursson forstjóri WOW air: „Við erum verulega stolt af því að vera að hefja okkur til flugs í dag.  Þetta eru spennandi tímar, en við teljum ferðamannamarkaðinn á Íslandi vera að stækka og ætlum okkur hlut í þeirri köku. Við vonumst til að sjá áframhaldandi fjölgun í heimsóknum erlendra ferðamanna til og frá Íslandi en einnig vonumst við til að sjá aukningu hjá íslenskum ferðamönnum í kjölfar batnandi efnahagsástands og lækkandi flugfargjalda.  Við höfum nú þegar fengið móttökur framar björtustu vonum og erum innilega þakklát fyrir það“.

Í dag starfa um 80 manns hjá félaginu en ráðningar á fjölmörgum starfsmönnum í viðbót standa nú yfir en um 450 manns sóttu um stöðugildi sem félagið auglýsti laus nýlega.  Félagið starfrækið einnig ferðaskrifstofuna WOW ferðir sem sérhæfir sig í ferðum á helstu áfangastaði móðurfélagsins og mun auka framboð sitt verulega á komandi misserum.

Skúli Mogensen eigandi og stjórnarformaður WOW air: „Það er fátt magnaðra en að sjá drauma verða að veruleika.   Í dag er WOW air orðið að veruleika og ég er óheyrilega stoltur yfir þeim frábæra hópi starfsfólks sem hefur unnið dag og nótt við að láta drauminn okkar um að fljúga verða að veruleika.  Ég er sannfærður um að þetta sé aðeins byrjunin á löngu ferðalagi sem við hlökkum til að deila og njóta með gestum okkar út um allan heim“.